Во денешно време, кога брзаме да ги завршиме сите обврски во текот на денот, дури и забораваме да обрнеме внимание на тоа што и како јадеме. Сите гледаме да нарачаме нешто брзо и да го изедеме на нога. Затоа, ќе ги споделам овие рецепти со вас. Сметам дека сите имаме барем 30тина минути во денот да направиме нешто брзо и едноставно без да поседуваме посебни кулинарски способности.
Шпагети со сос
Потребни состојки:
едно пакување шпагети
250 гр. конзервиран наут
100 гр. спанаќ
50 гр. сирење
50 гр. кашкавал
200 гр. кисела павлака
2 лажици масло
прстофат сол
сок од еден лимон
2 чешлиња лук
едно авокадо (по избор)
Еве еден предлог за брз и здрав ручек за кој ви се потребни само 30тина минути.
Ставете ги шпагетите да се варат, а во меѓувреме подгответе го сосот за кој ви се потребни состојките и еден блендер – тоа е се. Најпрво ставете го наутот (измиен и излупен) со 2 лажици масло и лимоновиот сок – изблендирајте. Потоа додадете ги сите останати состојки – киселата павлака, сирењето и кашкавалот, спанаќот, лукот и прстофат сол. Јас немам ставено, но вие може да додадете и авокадо доколку сакате. Изблендирајте додека не се соединат состојките и сосот е готов. Уживајте во здравиот оброк.
Солени мафини
Потребни состојки:
300 гр. брашно
1 ќесичка прашок за пециво
100 гр. рендан кашкавал
2 шолји јогурт
2 лажички оригано
2 лажички сол
1 јајце
Ова е совршен доручек за мрзливи утра кога сакате јадете нешто интересно, а сепак да не одзема многу време и енергија. Се што треба да се направи е состојките се изматат заедно, и потоа смесата се става во модли и се пече 20тина минути. – Наједноставен доручек спремен за 15 минути. И уште една информација која верувам ќе ве примами да ги направите – мафините се меки како памукче.
Пилешко во крем сос
Потребни состојки:
500/600 гр. пилешко месо – исечено на коцки
200 гр. кисела павлака
70 гр. кашкавал – рендан
1 лажица сенф
2 чешниња лук – рендано
четвртина кромид – рендано
зачини – сол, мешан зачин, оригано, црвен пипер
Ова е мојот омилен ручек! Идеален за луѓе кои сакаат млечни производи и зачинета храна. Овој рецепт за пилешко месо, примами личност која не е љубител на месо, да проба и дури и да побара повторно да го направам. Па ќе го оставам тука рецептот, и се надевам ќе ви се допадне и вам.
Во тава со малку масло, се запржуваат лукот и кромидот, потоа се додава пилешкото месо. Се запржуваат заедно, па се додаваат зачините, киселата павлака и сенфот. Кога сите состојки ќе се соединат, пред да ја тргнете тавата од оган, додадете го кашкавалот. Кога ќе се растопи кашкавалот, тргнете ја тавата од оган и ручекот е спремен. Потребно е да издвоите само 30тина минути за да го пробате овој специјалитет со пилешко месо.
Мора да сте логирани да напишете коментар.